14. decembrī 14:00 stuņdēs Latvejis Nacionaluos bibliotekys 8. stuova
skaiteitovā byus vareiba satikt i runuot ar divu projektu puorstuovim, kas
prezentēs pilotverseju latgalīšu volūdys tezauram i pīminis i atkluošmu gruomotu
“Vitolds Valeiņs: personeiba i dorbi”, kai ari sasatikt ar profesori Lideju Leikumu
juos eipašajā dīnā.
Latgalistikai eipašā dīnā — profesoris Lidejis Leikumys 70 godu dzimšonys
dīnā — nūteik divu projektu rezultatu prezentaceja.
Latgalīšu volūdys tezaurs (LTG T) ir īcarāts kai elektroniska skaidrojūša i
sinonimu vuordineica, kam ir treis pamataizdavumi. Pyrmkuort, dokumentēt latgalīšu
leksiku vysā juos bogoteibā, vīnā vītā apkūpojūt datus nu leluokajim 20. i 21. godu
symta drukuotajim i elektroniskajim olūtim. Ūtrkuort, saglabuot i atteisteit latgalīšu
rokstu volūdu, mudynuot paplatynuot tuos lītuojuma jūmys. LTG T byus kai paleigs
sevkuram, kas pietej, roksta ci skaita latgalīšu tekstus, kas vuicuos ci vuica latgalīšu
volūdu i lītoj jū rakstiski darejumu sferā i socialajūs teiklūs. Treškuort, tys ir vīns no
digitalūs reiku, kas nūdrūšynoj modernu volūdys lītuojumu i atteisteibu.
Projekts īsuokts 2022. goda izskaņā i itamā šaļtī teik atkluota lītuotuojam juo
pilotverseja, kab pasavārtu, cik lels ir pīprasejums, kai lītuotuojs tū viertej, kai apkūpuot
informaceju piec īspiejis lītuotuojam draudzeigā veidā i napazaudēt zynuotniskumu.
Vuordineicā tyka īkļauti vuordi, kas atlaseiti nu Myusu dīnu latgalīšu tekstu korpusa
(MuLa 2022), nūsokūt bīžuok lītuotūs i nu latvīšu literaruos volūdys atškireigūs vuordus,
stabilus vuordu savīnuojumus, tymā skaitā frazeologismus. Sevkurs šķirkļa vuords ir
puorbaudeits primarajūs olūtūs. Veidojūt škirkļus ir bejs daudz naskaidreibu.
Pilotversejis atvieršona lītuotuojam ļaus dreizuok vierzeitīs iz piļneiguoku vuordineicu,
atbiļdēt iz daudzim vēļ naatbiļdātim vaicuojumim. LTG T veidoj Rēzeknis Tehnologeju
akademijis pietnīki sadarbeibā ar LU Muoksleiguo intelekta laboratorejis puorstuovim.
Latgalīšu kulturys bīdreiba realizej VKKF projektu „Pīminis i atkluošmu
gruomotys „Vitolds Valeiņs: personeiba i dorbi‟ sakuortuošona i izdūšona‟.
14. decembrī 15:00 stuņdēs varēs tiktīs ar projekta dorba grupu – profesori Lideju
Leikumu, V. Valeiņa mozmeitu Teiku Lapsu i itūs rindeņu autori, taipoš satikt cylvākus,
kas paleidzejuši gruomotys saturiskajā voi finansialajā tapšanā.
Dorbs pi gruomotys ritēja vysu godu, tok golā beja gryuteibys nūsaapļuot: beja
daudz materiala, vēļ vaira komentaru i bilžu, kū gribējuos īlikt gruomotā par vīnu nu
izcyluokūs literaturzynuotniskuos i kritiskuos dūmys veiduotuojim — Vitoldu Valeini.
Gruomotys skaiteituoju lūku nūteikti paplatynuos tys, ka gruomotā ir puorstuovāti
dažaidi žanri (profesora i juo laikabīdru atminis, laikabīdru viestulis i profesora i juo
kuņdzis liriskuo sarakste, V. Valeiņa dzeja i anekdošu kūpa, kū vuocs pats profesors;
piļneiga juo dorbu bibliografeja), kai ari fakts, ka leluokuo daļa tekstu ir
pyrmpubliciejums.
Pasuokuma gaitā byus vareiba apsavērt jaunūs izdavumus, puorrunuot
latgalistikys aktualitatis, pavaicuot profesorei L. Leikumai par juos lūmu i doromajim
dorbim latgalistikā.
Pasuokums teik organizāts ar projektu: „Atvārtys i FAIR principim atbilstūšys
digitalūs humanitarūs zynuotņu ekosistemys atteisteiba Latvejā‟ (Nr. VPP-IZM-DH-
2022/1-0002); Vaļsts kulturkapitala fonda mierķprogramys “Latvīšu viesturiskūs zemu
atteisteibys programa”, Latgalīšu kulturys 2024 projekts „Pīminis i atkluošmu gruomotys
„Vitolds Valeiņs: personeiba i dorbi‟ sakuortuošona i izdūšona‟ (LKP2024/04), –
atbolstu.
Ilga Šuplinska,
pasuokuma koordinatore
